käsitüü:
lang ja Lamba'; tarõkraam

Kihnu maalamba’ kasusõ’ mi talohn inämb uma lõbu peräst ja perrerahvalõ ilos ja rõõmus. Näil um uma joonikanõ lambahotell ja tävveste murrilda elo. Ku nä kaska maaha viskasõ’, saa nalľa – nä kargõlõsõ’ ku kutsiga’ ja ei tunnõ ütstõist är. Kihnu maalamba vill um katõ kihiga ja pehme. Villa um kraasit ja kedrät korgõ häädüsegä langas väikun muudsan Muru villavabrikuhn.

Alguperäline värvmäldä lang

Mi lambilt saa halli ni valgõt langa, halli saa kattõ tuuni. Kihnu lamba lang passis väega häste kudamisõs ni um ka süändlämmistäjä kingitüs egähn vannusõhn kudajalõ. Langa saa osta’ kilo kaupa, ku jakus. Võit tulla’ esi’ Haanimaalõ umalõ langalõ perrä, a saadami ka postiga pakiautomaati. Korgõ häädüsegä lang mass 100 eurot/kg, ku saata’, sõs postikulu tulõ mano.

Lambanaha', lambavillast tettü kattõ’, puhast tõugu Kihnu maalamba uti’ ja oina’

Pakumi viil ka esisugumadsõ värmiga lambanahku ni lambavillast tettüid kattit (ee k villak), miä näütäse’ vällä ku lambanaha’ ja passisõ’ ilosas vaibas vai sohvakattõs, lämmäs istmisalossõs ja muus. Nahko ja lambavillakattit olõ-õi palľo, tuuperäst um hää erälde küssü’, ku um huvvi näid osta’.

Kiä taht hindäle Kihnu maalammast mi väikust sordiluumiskaŕast, sõs ka tuud saa. Meil umma’ olõmahn tõvvuraamatuhe kantu’ Kihnu maalamba uti’, a periolõgitunniskiraga oinit parhilla olõ'i.

Käsitüümüübli

Tõõnõkõrd teemi esi’ ka tarõkraami, õkva säänest, miä um nätä’ mi väikuhn majahn (kae’ gallõriid kavvõsttüü/üümaja alalehe lõpuhn). Sängü’, riioli’, kapiussõ’, mitmõsugumadsõ’ lavva’, pingi’ ja muu müübli – kõkkõ tege mi taidsa Joosõp ummi kullatsidõ kässiga. Kiroda’ vai kõlista’ meile, kõnõlõmi läbi ja ku mi saa, sõs avitami hää meelega.